ఆ రెండు ఆలయాలకు అర కిలోమీటరు పరిధిలో నాన్-వెజ్ బ్యాన్!

 

 

ప్రముఖ జ్యోతిర్లింగ క్షేత్రం సోమ్‌నాథ్, అంబాజీ ఆలయాల అర కిలోమీటరు పరిధిలోని ప్రాంతాన్ని శాకాహార జోన్‌గా ప్రకటిస్తూ గుజరాత్ ప్రభుత్వం కీలక నిర్ణయం తీసుకుంది. సౌరాష్ట్రలోని సోమ్‌నాథ్, ఉత్తర గుజరాత్‌లో అంబాజీ ఆలయాలను హిందువులకు ప్రముఖ పుణ్యక్షేత్రాలు. ఈ ఆలయాల సమీపంలో 500 మీటర్ల పరిధిలోని మాంసాహార అమ్మకాలను నిషేధిస్తున్నట్టు గుజరాత్ సీఎం విజయ్ రూపానీ శుక్రవారం ప్రకటించారు. బనస్కాంత జిల్లాలోని పలన్‌పూర్‌లో జరిగిన ఓ కార్యక్రమంలో పాల్గొన్న విజయ్ రూపానీ ఈ నిర్ణయం వెలువరించారు. ఈ సందర్భంగా ఆయన మాట్లాడుతూ.. సోమ్‌నాథ్, అంబాజీ ఆలయాల 500 మీటర్ల పరిధిలో మాంసాహార విక్రయించరాదని, ఈ ప్రాంతాల్లో పూర్తి నిషేధిస్తున్నట్టు తెలిపారు. మాంసాహరం అమ్మకాలను నిషేధించాలని అనేక ఏళ్లుగా పలు హిందూ సంస్థలు, ఈ ఆలయాల పరిసరాల్లోని ప్రజలు డిమాండ్ చేస్తున్నారు. గుజరాత్ ప్రభుత్వ తాజా నిర్ణయంపై వారు హర్షం వ్యక్తం చేస్తున్నారు. ఇక, గిర్ జిల్లాలోని సోమ్‌నాథ్ ఆలయానికి చారిత్రకంగా ఎంతో విశిష్టత ఉంది.

ద్వాదశ జ్యోతిర్లంగ క్షేత్రమైన సోమ్‌నాథ్ ఆలయాన్ని దర్శించడానికి దేశం నలుమూలల నుంచి అనేక మంది తరలివస్తారు. విదేశీయుల దండయాత్రలకు గురైన ఈ ఆలయాన్ని అనేకసార్లు పునర్మించారు. ప్రస్తుతం ఉన్న ఆలయాన్ని 1951లో చాళుక్యుల కాలం నాటి శైలిలో నిర్మించారు. అంతకు ముందు గజనీ మహ్మద్, ఘోరీ మహ్మద్ లాంటి వాళ్లు ఈ ఆలయాన్ని అనేక సార్లు ధ్వంసం చేశారు. ఎన్నో విదేశీ దండయాత్రలను తట్టుకుని సోమ్‌నాథుడు తన ఉనికిని చాటుకున్నాడు. 12 జ్యోతిర్లింగాలలో సోమ్‌నాథ్‌ ఆలయం మొదటిది. సర్దార్ వల్లభాయ్ పటేల్ ప్రారంభించిన జీర్ణోద్దరణ పనులను కేఎం మున్షి పూర్తిచేశారు.